పాపం! శ్వేతాబసు!!

      పన్నెండేళ్ళ క్రితం అంటే 2002లో 'మక్డీ' అనే హిందీ చిత్రం చూశాం. మక్డీ అంటే సాలీడు అన్నమాట. ఒక పల్లెటూరులో ఒకానొక పాడుబడిన ఇల్లు. ఆ ఇంటి గేటు దాటి లోపలి వెళ్ళిన వారెవరూ తిరిగి రాలేదు. ఆ ఇంట్లో మంత్రగత్తె ఉందని, ఆవిడే అందరినీ మాయం చేసేస్తుందని పుకార్లు. తన చెల్లెలి కోసం అలాంటి ఇంట్లోకి వెళ్తుంది ఒక తెలివైన పదేళ్ళ పాప. తన చెల్లెలిని రక్షించుకోవడమే కాకుండా ఆ ఇంటి రహస్యాన్ని, మంత్రగత్తె మోసాన్నీ బట్టబయలు చేసి ఊరి వారందరితో వహ్వా అనిపించుకుంటుంది ఆ పాప. మంత్రగత్తెగా షబానా అజ్మి నటించగా చున్ని, మున్నీ అనే కవల అక్కాచెల్లెళ్ల పాత్రల్లో శ్వేతా ప్రసాద్ అనే బాలనటి నటించింది. విశాల్ భరద్వాజ్ దర్శకత్వంలో వచ్చిన మక్డీ చిత్రంలో శ్వేత నటనకు అందరూ ముగ్ధులయ్యారు. చున్నీ పాత్రలో ఎంత అల్లరిగా కనిపించిందో , మున్నీ పాత్రలో అంత అమాయకంగానూ నటించి మెప్పించింది.  2003 జాతీయ చిత్ర పురస్కారాలలో శ్వేతకు ఉత్తమ బాలనటి అవార్డు కూడా వచ్చింది. అయితే ఆ సినిమాలో ఎంతో తెలివిగా సాలీడు (మంత్రగత్తె) పనిపట్టిన శ్వేత, నిజజీవితంలో మాత్రం సినిమా ప్రపంచం అనే సాలెగూటిలో చిక్కి బయటపడలేక పోతోంది.

నేటి జార్ఖండ్ రాష్ట్రంలో పుట్టిన శ్వేతాబసు ప్రసాద్ తల్లి బెంగాలీ, తండ్రి బీహారీ. మక్డీ సినిమాలో నటించేటప్పటికి శ్వేత పదకొండేళ్ళ అమ్మాయి. నటిగా ఆమెకు ఉజ్వల భవిష్యత్తు ఉంటుందని అందరూ అనుకునేలా తన ప్రతిభను నిరూపించుకున్న శ్వేత ఆ తర్వాత ఇక్బాల్ అనే సినిమాలోనూ, కొన్ని హిందీ సీరియళ్లలోనూ నటించింది. ఉన్నట్టుండి 'కొత్త బంగారులోకం' అనే తెలుగు సినిమాలో హీరోయిన్ గా ప్రత్యక్షం అయ్యింది.  'ఎ.. క్క.. డ ?' అంటూ అక్షరాలను విడదీస్తూ పలికే ఆ టీనేజి అమ్మాయి పాత్ర యువతను బాగా ఆకట్టుకుంది.  ఆ సినిమా కమర్షియల్ గా కూడా విజయవంతం అయింది.  ఇంకేం ఎప్పటికప్పుడు కొత్త హీరోయిన్ల కోసం వెదుకులాడే మన నిర్మాతలకి కొత్త బంగారం దొరికిందని అనుకున్నారంతా. కానీ అదేం విచిత్రమో తెలీదుకానీ అవకాశాలను అందిపుచ్చుకునే రేసులో శ్వేత వెనుకబడింది. దానికి తోడు బాగా లావెక్కడం, ఆ తరవాత వచ్చిన ఒకటి రెండు సినిమాలు సక్సెస్ కాకపోవడంతో నిర్మాతలెవరూ ఆమె వైపు చూడలేదు. ప్రేక్షకులు కూడా శ్వేతను మర్చిపోయారు. చివరికి ఐటెం సాంగులకు కూడా ఒప్పుకుని చేయడం మొదలుపెట్టింది కానీ అవి కూడా ఆదరణకు నోచుకోలేదు. సీన్ కట్ చేస్తే వ్యభిచారం చేస్తోందని పుకార్లు.  నిజమా అనుకుని ఆశ్చర్యపోయి అంతటితో మర్చిపోయారు జనం. మళ్ళీ ఇదిగో ఇప్పుడిలా వార్తలు.

గత రెండు రోజుల నుంచి వార్తా పత్రికలు, వెబ్ మీడియా, సామాజిక వెబ్ సైట్ లు, టీవీ చానెళ్ళు అన్నింటా శ్వేతాబసు గురించే రాతలు, మోతలు. గతంలో ఆమెపై ఇలాంటి కథనాలు ప్రసారం చేసిన ఒక టీవీ చానెలే స్టింగ్ ఆపరేషన్ ద్వారా పోలీసులకు రెడ్ హ్యాండెడ్ గా పట్టించిందని ఒక వార్త. పోలీసులు మామూలుగా చేసిన రైడింగ్ లో అనుకోకుండా   దొరికిందని ఇంకో వార్త. అదేం కాదు పక్కా సమాచారంతో మేమే రైడింగ్ చేశాం అని పోలీసు కథనాలు మరో పక్క. రెడ్ హ్యాండెడ్ అంటే విటుడు కూడా ఉండాలి కదా! దానిమీద కూడా భిన్నమైన కథనాలు. ఎవరో ఒక పారిశ్రామిక వేత్త కమ్ రాజకీయ నాయకుడితో ఉండగా పట్టుపడిందని, అయితే ఆ వ్యక్తి తన పలుకుబడి ఉపయోగించి తన పేరు బయటికి రాకుండా చూసుకున్నాడని మొదట్లో వచ్చిన వార్త. ఇంతలోనే పోలీసులు కథ మార్చి మేం చేసిన ఆపరేషన్ లో విటుడిగా మా వాడే నటించాడు అని చెప్పారు.

సరే ఏదో జరిగింది. శ్వేత వ్యభిచారమే చేస్తోందని అనుకుందాం. అదే నిజం అయినప్పుడు ఆమె పేరును మరీ అంతగా బయట పెట్టాల్సిన అవసరం ఏముంది? రోజుకు లక్ష అని మీరే చెప్తున్నారు. అంటే ఆమెతో గడిపే వారంతా పెద్ద(డబ్బు) మనుషులే అని వేరే చెప్పక్కర్లేదు. మరి వారి పేర్లెందుకు బయటపెట్టరు? డబ్బున్న వారితో చట్టానికి ఏమిటీ లాలూచి? రాజకీయనేతలు, పారిశ్రామికవేత్తల ప్రమేయం లేకుండానే ఇలాంటి వ్యాపారాలు సాగుతున్నాయా? అన్నవి సామాన్యుల మదిలో మెదిలే ప్రశ్నలు.

పోలీసుల సంగతి పక్కన పెడితే హీరోయిన్ల చుట్టూ తిరిగి స్టింగ్ ఆపరేషన్ లు చేసి పలానా హీరోయిన్ ఈ వ్యాపారం చేస్తోంది అని ఊదరగొట్టే మీడియా, అదే పని రాజకీయ నాయకులతోనో, పారిశ్రామికవేత్తలతోనో చెయ్యొచ్చుగా. అది చెయ్యరు. ఒకవేళ అలా చేసినా పేరు బయటరాకుండా ఉండటానికి బేరాలు కుదుర్చుకుంటారు. మగాడి విషయం వచ్చేసరికి అలా, ఆడదాని విషయం వచ్చే సరికి రేటింగ్స్ పెంచుకునే ముడి సరుకుల్లా కనిపిస్తారు వీళ్ళ కంటికి. నిండా పాతికేళ్ళు నిండని ఒక అమ్మాయి ఇలాంటి పనులు చేస్తుంటే, దాని వెనుక ఉన్న సామాజిక కారణాలేంటో పరిశోధించడం మాని కనీస జాలి అన్నది లేకుండా ఆ వార్తను పదే పదే చూపించి ఆ అమ్మాయి బతుకును మరింత బుగ్గిపాలు చెయ్యడం జర్నలిజం అనిపించుకుంటుందా? అసలు సమాజంలో జరుగుతున్న ఇలాంటివి చూపించేటప్పుడు వాటిని మన పిల్లలూ చూస్తారని గానీ, వాళ్ళూ ఇదే సమాజంలో పెరుగుతున్నారని గానీ ఈ చానెళ్ళ వాళ్ళు మర్చిపోతారెందుకో!   

ఇది అవకాశాల్లేని సినిమా హీరోయిన్ లు మాత్రమే చేస్తున్న పని కాదు. డబ్బు అవసరమై, విలాసాలకు మరిగి తేలిగ్గా సంపాదించే ఆలోచనలు ఉన్న అమ్మాయిలలో  చాలామంది ఈ మార్గాన్ని ఎంచుకుంటున్నారన్న కథనాలు, వార్తలు వింటూనే ఉన్నాం. తల్లి దండ్రులకు ఇందులో చాలా బాధ్యత ఉంది. అటు అబ్బాయిలున్న వారైనా, అమ్మాయిలున్న వారైనా విలువల గురించి తమ పిల్లలకి చెప్పాలి. డబ్బు ఖర్చు పెట్టే విధానంపై కన్నేసి ఉంచాలి.  అవసరాల మేరకే ఖర్చు చెయ్యడం అన్నది చిన్నప్పటినుంచే నేర్పాలి. ఈ అలవాటు శ్వేతాబసుకు వాళ్ళ తల్లిదండ్రులు నేర్పివుంటే, వాళ్ళు కూడా కూతురు సంపాదన ఏ రకంగా అయినా ఇంతకు పదింతలు ఉండాలని ఆశపడి ఉండకపోతే ఆ అమ్మాయి ఇలా ఈనాడు వార్తల్లో ఉండక పోయేదేమో!