దీపిక అంటే మన బాలీవుడ్ నటీమణి దీపికా పడుకోన్. కోపం ఎందుకు సినిమాల్లేవా అంటే ఎందుకు లేవు, హిట్ల మీద హిట్లు కొట్టేస్తూ ప్రస్తుతం బాలీవుడ్ ని మహారాణిలా ఎలేస్తోంది దీపిక. మరి ఇంకా ఎందుకు కోపం? మీడియా వాళ్ళేమైనా ఎవరితో అయినా లింకు పెట్టేశారా అంటే అది ఆమెకు మామూలే. ఏది మామూలు అని మళ్ళీ అడక్కండి. బాయ్ ఫ్రెండ్స్ ని తరచూ మార్చినట్టు మీడియా ఎప్పటికప్పుడు రాయక పోతే హీరోయిన్లకు, ముఖ్యంగా బాలీవుడ్ హీరోయిన్లకు తమ డిమాండ్ తగ్గిపోయిందేమో అని డౌటొచ్చేస్తది. మరెందుకు కోపం వచ్చింది అంటే కారణం ఇది.
సినిమాలో కాకుండా బయట మరేదో సందర్భంలో దీపిక తన వక్షోజాలు బహిర్గతం అయ్యేలా వస్త్రాలను ధరించి కనబడిందట. ఆ దృశ్యాన్ని క్లిక్ మనిపించేసిన టైమ్స్ ఆఫ్ ఇండియా అనే ప్రముఖ ఆంగ్ల వార్తా పత్రిక, 'దీపిక బాలీవుడ్ లో కాకుండా బయట కూడా ఇలా ప్రదర్శిస్తోంది ' అన్నట్టుగా కామెంట్ రాసి జనాల మీదికి వదిలేసింది. (అంటే సినిమాలో ప్రదర్శిస్తే తప్పు లేదని ఆ పత్రిక అభిప్రాయమా? లేక బయట కూడా ఈ ఖర్మ ఏంటని బాధా?) అది చూసి దీపికకు కోపం వచ్చింది. 'స్త్రీలను గౌరవించడం రానప్పుడు మీకు మహిళా సాధికారత గురించి మాట్లాడే అర్హత లేదు' అంటూ ట్వీట్ గా దులిపేసింది. అంతటితో ఊరుకోలేదు. 'అవును! నేను ఆడదాన్ని. నాకు వక్షోజాలు ఉన్నాయి. మీకేంటి సమస్య?' అంటూ బోల్డ్ గా తిరగబడింది. ఈ స్టైలు చూసి జనాలు ముగ్దులై పోయారు. ఆహా! ఏమడిగింది అని అంటూ ఆమెకు మద్దతుగా ట్వీట్లు రాసారు. హీరో షారూఖ్ ఖాన్ కూడా ఆమెకు అండగా నిలిచాడు. చివరకు సదరు పత్రిక ఆ వార్తను డిలీట్ చేసేసింది. ఇంకేం కథ ముగిసిందిగా. అయిపోయిన పెళ్ళికి బాజాలు అన్నట్టు ఇప్పుడీ బ్లాగుడేందుకు అనంటారు అవునా? ఇది అయిపోయిన కథ కాదు. నడుస్తున్న చరిత్ర. అందుకని దీపికను అడగాల్సిన విషయాలు కొన్నున్నాయి.
మహిళా సాధికారత గురించి ఆవిడకు ఏం తెలుసు?
ఈ రకమైన వస్త్రధారణకు మహిళా సాధికారతకు సంబంధం ఏంటి? వివక్షతకు తావు లేకుండా సామాజిక వనరులు, అవకాశాలు, అధికారాలను అందుకోడానికి అర్హతలను సంపాదించుకునే అవకాశాన్ని మహిళకు ఇవ్వడమే 'సహా అధికారం'. అంతేగాని ఇలాంటి ప్రదర్శనకు సాధికారతకు సంబంధం లేదు. మీ మాటలు విన్న అమ్మాయిలు సాధికారత అంటే ఇదేనేమో అనుకుని మిమ్మల్ని అనుసరిస్తే వాళ్ళ గతేం కాను. మీకేం? మీరు ఇంటి నుంచి బయటకు అడుగుపెడితే కారులో వెళ్తారు. అంగరక్షకులను పెట్టుకుంటారు. ఇంకా కావాలంటే ఫ్రండ్స్ ఉండనే ఉంటారు. ఏం జరిగినా షారుఖ్ లాంటి వాళ్ళు మీకు బాసటగా నిలుస్తారు. కానీ మిమ్మల్ని ఆదర్శంగా తీసుకుని ఒక మధ్యతరగతి అమ్మాయి ఇలా బయటకు రావాలంటే ఆమె రోడ్డు చివర వరకూ వెళ్లి ఆటో ఎక్కాలి. ఆఫీసుకు వెళ్లి అందరి మధ్యా గడపాలి. ధన మదాంధులు, అధికార మదాంధులు ... ఇలా సాహిత్యపరంగా అంధులని పిలవబడే డేగ కళ్ళ నుంచి తప్పించుకు తిరగడం సాధ్యమా?
ఒక్క మాటకు సమాధానం చెప్పండి. సినిమాల్లో మీ అంగాంగ ప్రదర్శన ఎందుకోసం? ఫంక్షన్ లలో కూడా ఆ ప్రదర్శన ఎందుకు? పబ్లిసిటీ కోసమేగా? మీరు సినిమా నటులతే మాత్రం అందాల ప్రదర్శన చెయ్యాలని రూలుందా? చెన్నై ఎక్స్ ప్రెస్ ను జనం చూడలేదా?
శ్వేతాబసుకు మీ మద్దతు తెలిపారు అంతవరకూ బాగానే ఉంది. కానీ ఆమె గురించి మాట్లాడుతూ కుటుంబ పోషణ కోసం ఆ దారిలో వెళ్తే తప్పేంటి అన్నారు. బొత్తిగా సామాజిక బాధ్యత లేదా మీకు? వ్యక్తిగతంగా ఎవరు ఎవరితో ఎలాంటి సంబంధాలు పెట్టుకున్నా ప్రశ్నించే అధికారం ఎవరికీ లేదు. ఆమె చేస్తున్నది వ్యాపారం. అంటే అది సామాజిక సమస్య అయ్యింది. వ్యాపారంలో డబ్బు ఉంటుంది. బ్రోకర్లు ఉంటారు. తమ క్లయింట్లకు కొత్త రుచులు చూపించడానికి ఇష్టపడి వచ్చే అమ్మాయిలనే కాదు. అమాయకపు పిల్లల్ని కూడా బలవంతంగా ఆ వృత్తి లోకి దింపడం జరుగుతుంది. మీలాంటి ఇలాంటి ప్రశ్నలు వేసి గొప్ప అనుకుంటారు. కానీ ఆ మాటలు ఒక సామాన్యమైన ఆడపిల్లని ఎంతగా ప్రభావితం చేస్తాయో మీకు తెలుసా? మీ డబ్బున్న వాళ్ళ బలుపుని, విచ్చలవిడి సంస్కృతిని పేద, మధ్య తరగతి పై ఎందుకు రుద్దుతారు?
మీకు ఉన్నాయి కదా అని ప్రదర్శించడమేనా?
సమస్య ఏంటి అని అడిగారు కదా! అలా మిమ్మల్ని చూసిన వాళ్ళు అందుబాటులో ఉన్న మరో పిల్లలో మిమ్మల్ని చూసుకుంటున్నారు. అదీ ఖర్మ. ఒక రాజకీయ నాయకుడి ఆన్ లైన్ అక్కౌంట్ కి లక్ష లైకులు వస్తే ఎక్కువ. అలాంటిది రెండు హిట్ సినిమాలు కూడా లేని హీరోయిన్ కి మాత్రం ఇరవై, ముప్పై లక్షల లైకులా? వాళ్ళంతా మీ వ్యక్తిత్వం నచ్చిన వాళ్ళా? మీ అందాలు నచ్చిన వాళ్ళా? ఆలోచించండి.
అయ్యా షారూక్ మహాశయా!
అమీర్ ఖాన్ నగ్నంగా కనిపిస్తే అది ప్రతిభ అనిపించుకోదు అన్న నీకు దీపిక ఎలా కనిపించినా తప్పులేదా? ఏమిటీ హిపోక్రసీ?
నిజమె, అంతా హిపోక్రసీ!
రిప్లయితొలగించండి